24. Udakāsanavaggo

24. Udakāsanavaggo

1. Udakāsanadāyakattheraapadānaṃ

1.

‘‘Ārāmadvārā nikkhamma, phalakaṃ santhariṃ ahaṃ;

Udakañca upaṭṭhāsiṃ, uttamatthassa pattiyā.

2.

‘‘Ekattiṃse ito kappe, yaṃ kammamakariṃ tadā;

Duggatiṃ nābhijānāmi, āsane codake phalaṃ.

3.

‘‘Ito pannarase kappe, abhisāmasamavhayo;

Sattaratanasampanno, cakkavattī mahabbalo.

4.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā udakāsanadāyako thero imā gāthāyo abhāsitthāti.

Udakāsanadāyakattherassāpadānaṃ paṭhamaṃ.

2. Bhājanapālakattheraapadānaṃ

5.

‘‘Nagare bandhumatiyā, kumbhakāro ahaṃ tadā;

Bhājanaṃ anupālesiṃ, bhikkhusaṅghassa tāvade.

6.

‘‘Ekanavutito kappe, bhājanaṃ anupālayiṃ;

Duggatiṃ nābhijānāmi, bhājanassa idaṃ phalaṃ.

7.

‘‘Tepaññāse ito kappe, anantajālināmako;

Sattaratanasampanno, cakkavattī mahabbalo.

8.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā bhājanapālako [bhājanadāyako (sī. syā.)] thero imā gāthāyo abhāsitthāti.

Bhājanapālakattherassāpadānaṃ dutiyaṃ.

3. Sālapupphiyattheraapadānaṃ

9.

‘‘Aruṇavatiyā nagare, ahosiṃ pūpiko tadā;

Mama dvārena gacchantaṃ, sikhinaṃ addasaṃ jinaṃ.

10.

‘‘Buddhassa pattaṃ paggayha, sālapupphaṃ adāsahaṃ;

Sammaggatassa buddhassa, vippasannena cetasā.

11.

‘‘Ekattiṃse ito kappe, yaṃ pupphamabhidāsahaṃ [yaṃ khajjakamadāsahaṃ (sī.), yaṃ khajjamabhidāsahaṃ (ka.) sālapupphanāmakaṃ khajjakaṃ vā bhaveyya];

Duggatiṃ nābhijānāmi, sālapupphassidaṃ phalaṃ.

12.

‘‘Ito cuddasakappamhi, ahosiṃ amitañjalo;

Sattaratanasampanno, cakkavattī mahabbalo.

13.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sālapupphiyo thero imā gāthāyo abhāsitthāti.

Sālapupphiyattherassāpadānaṃ tatiyaṃ.

4. Kilañjadāyakattheraapadānaṃ

14.

‘‘Tivarāyaṃ pure ramme, naḷakāro ahaṃ tadā;

Siddhatthe lokapajjote, pasannā janatā tahiṃ.

15.

‘‘Pūjatthaṃ lokanāthassa, kilañjaṃ pariyesati;

Buddhapūjaṃ karontānaṃ, kilañjaṃ adadiṃ ahaṃ.

16.

‘‘Catunnavutito kappe, yaṃ kammamakariṃ tadā;

Duggatiṃ nābhijānāmi, kilañjassa idaṃ phalaṃ.

17.

‘‘Sattasattatikappamhi, rājā āsiṃ jaladdharo [jutindharo (sī.)];

Sattaratanasampanno, cakkavattī mahabbalo.

18.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā kilañjadāyako thero imā gāthāyo abhāsitthāti.

Kilañjadāyakattherassāpadānaṃ catutthaṃ.

5. Vedikārakattheraapadānaṃ

19.

‘‘Vipassino bhagavato, bodhiyā pādaputtame;

Pasannacitto sumano, kāresiṃ vedikaṃ ahaṃ.

20.

‘‘Ekanavutito kappe, kāresiṃ vedikaṃ ahaṃ;

Duggatiṃ nābhijānāmi, vedikāya idaṃ phalaṃ.

21.

‘‘Ito ekādase kappe, ahosiṃ sūriyassamo;

Sattarattanasampanno, cakkavattī mahabbalo.

22.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā vedikārako thero imā gāthāyo abhāsitthāti.

Vedikārakattherassāpadānaṃ pañcamaṃ.

6. Vaṇṇakārattheraapadānaṃ

23.

‘‘Nagare aruṇavatiyā, vaṇṇakāro ahaṃ tadā;

Cetiye dussabhaṇḍāni, nānāvaṇṇaṃ rajesahaṃ [rajiṃ ahaṃ (ka.), rajemahaṃ (syā.)].

24.

‘‘Ekattiṃse ito kappe, yaṃ vaṇṇaṃ rajayiṃ tadā;

Duggatiṃ nābhijānāmi, vaṇṇadānassidaṃ phalaṃ.

25.

‘‘Ito tevīsatikappe, vaṇṇasama [candupama (sī.), candasama (syā.)] sanāmako;

Sattaratanasampanno, cakkavattī mahabbalo.

26.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā vaṇṇakāro thero imā gāthāyo abhāsitthāti.

Vaṇṇakārattherassāpadānaṃ chaṭṭhaṃ.

7. Piyālapupphiyattheraapadānaṃ

27.

‘‘Migaluddo pure āsiṃ, araññe kānane ahaṃ;

Piyālaṃ pupphitaṃ disvā, gatamagge khipiṃ ahaṃ.

28.

‘‘Ekanavutito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

29.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā piyālapupphiyo thero imā gāthāyo abhāsitthāti.

Piyālapupphiyattherassāpadānaṃ sattamaṃ.

8. Ambayāgadāyakattheraapadānaṃ

30.

‘‘Sake sippe apatthaddho, agamaṃ kānanaṃ ahaṃ;

Sambuddhaṃ yantaṃ disvāna, ambayāgaṃ adāsahaṃ.

31.

‘‘Ekanavutito kappe, yaṃ dānamadadiṃ tadā;

Duggatiṃ nābhijānāmi, ambayāgassidaṃ phalaṃ.

32.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā ambayāgadāyako thero imā gāthāyo abhāsitthāti.

Ambayāgadāyakattherassāpadānaṃ aṭṭhamaṃ.

9. Jagatikārakattheraapadānaṃ

33.

‘‘Nibbute lokanāthamhi, atthadassi naruttame;

Jagatī kāritā mayhaṃ, buddhassa thūpamuttame.

34.

‘‘Aṭṭhārase kappasate, yaṃ kammamakariṃ tadā;

Duggatiṃ nābhijānāmi, jagatiyā idaṃ phalaṃ.

35.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā jagatikārako thero imā gāthāyo abhāsitthāti.

Jagatikārakattherassāpadānaṃ navamaṃ.

10. Vāsidāyakattheraapadānaṃ

36.

‘‘Kammārohaṃ pure āsiṃ, tivarāyaṃ puruttame;

Ekā vāsi mayā dinnā, sayambhuṃ aparājitaṃ [sayambhumhiparājite (?)].

37.

‘‘Catunnavutito kappe, yaṃ vāsimadadiṃ tadā;

Duggatiṃ nābhijānāmi, vāsidānassidaṃ phalaṃ.

38.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā vāsidāyako thero imā gāthāyo abhāsitthāti.

Vāsidāyakattherassāpadānaṃ dasamaṃ.

Udakāsanavaggo catuvīsatimo.

Tassuddānaṃ –

Udakāsanabhājanaṃ, sālapupphī kilañjako;

Vedikā vaṇṇakāro ca, piyālaambayāgado;

Jagatī vāsidātā ca, gāthā tiṃsa ca aṭṭha ca.

 

* Bài viết trích trong Khuddakanikāya >> Suttapiṭaka >> Tipiṭaka (Mūla), nguồn Tipitaka.org. Tải sách PDF tại đây.

 

TẢI MOBILE APP PHẬT GIÁO THERAVĀDA ĐỂ XEM THÊM NHIỀU THÔNG TIN HỮU ÍCH (ANDROID & IOS)