26. Thomakavaggo

26. Thomakavaggo

1. Thomakattheraapadānaṃ

1.

‘‘Devaloke ṭhito santo, vipassissa mahesino;

Dhammaṃ suṇitvā mudito, imaṃ vācaṃ abhāsahaṃ.

2.

‘‘‘Namo te purisājañña, namo te purisuttama;

Bahujjanaṃ [bahuṃ janaṃ (sī.)] tārayasi, desento amataṃ padaṃ’.

3.

‘‘Ekanavutito kappe, yaṃ vācamabhaṇiṃ tadā;

Duggatiṃ nābhijānāmi, thomanāya idaṃ phalaṃ.

4.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā thomako thero imā gāthāyo abhāsitthāti.

Thomakattherassāpadānaṃ paṭhamaṃ.

2. Ekāsanadāyakattheraapadānaṃ

5.

‘‘Vijahitvā devavaṇṇaṃ, sabhariyo idhāgamiṃ;

Adhikāraṃ kattukāmo, buddhaseṭṭhassa sāsane.

6.

‘‘Devalo nāma nāmena, padumuttarasāvako;

Tassa bhikkhā mayā dinnā, vippasannena cetasā.

7.

‘‘Satasahassito kappe, yaṃ kammamakariṃ tadā;

Duggatiṃ nābhijānāmi, piṇḍapātassidaṃ phalaṃ.

8.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā ekāsanadāyako thero imā gāthāyo abhāsitthāti.

Ekāsanadāyakattherassāpadānaṃ dutiyaṃ.

3. Citakapūjakattheraapadānaṃ

9.

‘‘Ānando nāma sambuddho, sayambhū aparājito;

Araññe parinibbāyi, amanussamhi kānane.

10.

‘‘Devalokā idhāgantvā, citaṃ katvānahaṃ tadā;

Sarīraṃ tattha jhāpesiṃ, sakkārañca akāsahaṃ.

11.

‘‘Ekanavutito kappe, yaṃ kammamakariṃ tadā;

Duggatiṃ nābhijānāmi, buddhapūjāyidaṃ phalaṃ.

12.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā citakapūjako thero imā gāthāyo abhāsitthāti.

Citakapūjakattherassāpadānaṃ tatiyaṃ.

4. Ticampakapupphiyattheraapadānaṃ

13.

‘‘Himavantassāvidūre , vikato [vikano (sī. syā.)] nāma pabbato;

Tassa vemajjhe vasati, samaṇo bhāvitindriyo.

14.

‘‘Disvāna tassopasamaṃ, vippasannena cetasā;

Tīṇi campakapupphāni, gahetvāna samokiriṃ.

15.

‘‘Ekanavutito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

16.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā ticampakapupphiyo thero imā gāthāyo abhāsitthāti.

Ticampakapupphiyattherassāpadānaṃ catutthaṃ.

5. Sattapāṭaliyattheraapadānaṃ

17.

‘‘Kaṇikāraṃva jotantaṃ, nisinnaṃ pabbatantare;

Satta pāṭalipupphāni, buddhassa abhiropayiṃ.

18.

‘‘Catunnavutito kappe, yaṃ pupphamabhiropayiṃ;

Duggatiṃ nābhijānāmi, buddhapūjāyidaṃ phalaṃ.

19.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sattapāṭaliyo thero imā gāthāyo abhāsitthāti.

Sattapāṭaliyattherassāpadānaṃ pañcamaṃ.

6. Upāhanadāyakattheraapadānaṃ

20.

‘‘Ahosiṃ candano nāma, sambuddhassatrajo tadā;

Ekopāhano mayā dinno, bodhiṃ sampajja me tuvaṃ.

21.

‘‘Ekanavutito kappe, yaṃ pānadhiṃ [yamupāhanaṃ (sī.), yaṃ pāduṃ (syā.)] dadiṃ tadā;

Duggatiṃ nābhijānāmi, upāhanassidaṃ phalaṃ.

22.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā upāhanadāyako thero imā gāthāyo abhāsitthāti.

Upāhanadāyakattherassāpadānaṃ chaṭṭhaṃ.

7. Mañjaripūjakattheraapadānaṃ

23.

‘‘Mañjarikaṃ karitvāna, rathiyaṃ paṭipajjahaṃ;

Addasaṃ samaṇānaggaṃ, bhikkhusaṅghapurakkhataṃ.

24.

‘‘Pasannacitto sumano, paramāya ca pītiyā;

Ubho hatthehi paggayha, buddhassa abhiropayiṃ.

25.

‘‘Dvenavute ito kappe, yaṃ pupphamabhipūjayiṃ;

Duggatiṃ nābhijānāmi, pupphapūjāyidaṃ phalaṃ.

26.

‘‘Ito tesattatikappe, eko āsiṃ mahīpati;

Jotiyo nāma nāmena, cakkavattī mahabbalo.

27.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā mañjaripūjako thero imā gāthāyo abhāsitthāti.

Mañjaripūjakattherassāpadānaṃ sattamaṃ.

8. Paṇṇadāyakattheraapadānaṃ

28.

‘‘Pabbate himavantamhi, vākacīradharo ahaṃ;

Aloṇapaṇṇabhakkhomhi, niyamesu ca saṃvuto.

29.

‘‘Pātarāse anuppatte, siddhattho upagacchi maṃ;

Tāhaṃ buddhassa pādāsiṃ, pasanno sehi pāṇibhi.

30.

‘‘Catunnavutito kappe, yaṃ paṇṇamadadiṃ tadā;

Duggatiṃ nābhijānāmi, paṇṇadānassidaṃ phalaṃ.

31.

‘‘Sattavīsatikappamhi , rājā āsiṃ sadatthiyo [yadatthiyo (sī. syā.)];

Sattaratanasampanno, cakkavattī mahabbalo.

32.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā paṇṇadāyako thero imā gāthāyo abhāsitthāti.

Paṇṇadāyakattherassāpadānaṃ aṭṭhamaṃ.

9. Kuṭidāyakattheraapadānaṃ

33.

‘‘Vipinacārī sambuddho, rukkhamūle vasī tadā;

Paṇṇasālaṃ karitvāna, adāsiṃ aparājite.

34.

‘‘Ekanavutito kappe, yaṃ paṇṇakuṭikaṃ adaṃ;

Duggatiṃ nābhijānāmi, kuṭidānassidaṃ phalaṃ.

35.

‘‘Aṭṭhavīse [aṭṭhatiṃse (syā.)] ito kappe, soḷasāsiṃsu rājāno;

Sabbattha abhivassīti, vuccare cakkavattino.

36.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā kuṭidāyako thero imā gāthāyo abhāsitthāti.

Kuṭidāyakattherassāpadānaṃ navamaṃ.

10. Aggapupphiyattheraapadānaṃ

37.

‘‘Suvaṇṇavaṇṇaṃ sambuddhaṃ, nisinnaṃ pabbatantare;

Obhāsayantaṃ raṃsena [raṃsiyā (syā.)], sikhinaṃ sikhinaṃ yathā.

38.

‘‘Aggajaṃ pupphamādāya, upāgacchiṃ naruttamaṃ;

Pasannacitto sumano, buddhassa abhiropayiṃ.

39.

‘‘Ekattiṃse ito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

40.

‘‘Pañcavīsatikappamhi, ahosi amitogato [amitavhayo (sī.)];

Sattaratanasampanno, cakkavattī mahabbalo.

41.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā aggapupphiyo thero imā gāthāyo abhāsitthāti.

Aggapupphiyattherassāpadānaṃ dasamaṃ.

Thomakavaggo chabbīsatimo.

Tassuddānaṃ –

Thomakekāsanacitakaṃ, campako sattapāṭali;

Pānadhi [pāhano (sī.), pādu (syā.)] mañjarī paṇṇaṃ, kuṭido aggapupphiyo;

Gāthāyo gaṇitā cettha, ekatālīsameva cāti.

 

* Bài viết trích trong Khuddakanikāya >> Suttapiṭaka >> Tipiṭaka (Mūla), nguồn Tipitaka.org. Tải sách PDF tại đây.

 

TẢI MOBILE APP PHẬT GIÁO THERAVĀDA ĐỂ XEM THÊM NHIỀU THÔNG TIN HỮU ÍCH (ANDROID & IOS)