13. Sereyyavaggo

13. Sereyyavaggo

1. Sereyyakattheraapadānaṃ

1.

‘‘Ajjhāyako mantadharo, tiṇṇaṃ vedāna pāragū;

Abbhokāse ṭhito santo, addasaṃ lokanāyakaṃ.

2.

‘‘Sīhaṃ yathā vanacaraṃ, byaggharājaṃva nittasaṃ;

Tidhāpabhinnamātaṅgaṃ, kuñjaraṃva mahesinaṃ.

3.

‘‘Sereyyakaṃ gahetvāna, ākāse ukkhipiṃ [nikkhipiṃ (ka.)] ahaṃ;

Buddhassa ānubhāvena, parivārenti sabbaso [sabbato (sī.)].

4.

‘‘Adhiṭṭhahi mahāvīro, sabbaññū lokanāyako;

Samantā pupphacchadanā, okiriṃsu narāsabhaṃ.

5.

‘‘Tato sā pupphakañcukā, antovaṇṭā bahimukhā;

Sattāhaṃ chadanaṃ katvā, tato antaradhāyatha.

6.

‘‘Tañca acchariyaṃ disvā, abbhutaṃ lomahaṃsanaṃ;

Buddhe cittaṃ pasādesiṃ, sugate lokanāyake.

7.

‘‘Tena cittappasādena, sukkamūlena codito;

Kappānaṃ satasahassaṃ, duggatiṃ nupapajjahaṃ.

8.

‘‘Pannarasasahassamhi , kappānaṃ pañcavīsati;

Vītamalā [cittamālā (sī.), vilāmālā (syā.)] samānā ca, cakkavattī mahabbalā.

9.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā sereyyako thero imā gāthāyo abhāsitthāti.

Sereyyakattherassāpadānaṃ paṭhamaṃ.

2. Pupphathūpiyattheraapadānaṃ

10.

‘‘Himavantassāvidūre , kukkuro nāma [kukkuṭo nāma (sī.)] pabbato;

Vemajjhe tassa vasati, brāhmaṇo mantapāragū.

11.

‘‘Pañca sissasahassāni, parivārenti maṃ sadā;

Pubbuṭṭhāyī ca te āsuṃ, mantesu ca visāradā.

12.

‘‘Buddho loke samuppanno, taṃ vijānātha no bhavaṃ;

Asītibyañjanānassa, bāttiṃsavaralakkhaṇā.

13.

‘‘Byāmappabho jinavaro, ādiccova virocati;

Sissānaṃ vacanaṃ sutvā, brāhmaṇo mantapāragū.

14.

‘‘Assamā abhinikkhamma, disaṃ pucchati sissake [brāhmaṇo (syā.)];

Yamhi dese mahāvīro, vasati lokanāyako.

15.

‘‘Tāhaṃ disaṃ namassissaṃ, jinaṃ appaṭipuggalaṃ;

Udaggacitto sumano, pūjesiṃ taṃ tathāgataṃ.

16.

‘‘Etha sissā gamissāma, dakkhissāma tathāgataṃ;

Vanditvā satthuno pāde, sossāma jinasāsanaṃ.

17.

‘‘Ekāhaṃ abhinikkhamma, byādhiṃ paṭilabhiṃ ahaṃ;

Byādhinā pīḷito santo, sālaṃ vāsayituṃ gamiṃ.

18.

‘‘Sabbe sisse samānetvā, apucchiṃ te tathāgataṃ;

Kīdisaṃ lokanāthassa, guṇaṃ paramabuddhino.

19.

‘‘Te me puṭṭhā viyākaṃsu, yathā dassāvino tathā;

Sakkaccaṃ buddhaseṭṭhaṃ taṃ, desesuṃ [dassesuṃ (sī. syā.)] mama sammukhā.

20.

‘‘Tesāhaṃ vacanaṃ sutvā, sakaṃ cittaṃ pasādayiṃ;

Pupphehi thūpaṃ katvāna, tattha kālaṅkato ahaṃ.

21.

‘‘Te me sarīraṃ jhāpetvā, agamuṃ buddhasantikaṃ;

Añjaliṃ paggahetvāna, satthāramabhivādayuṃ.

22.

‘‘Pupphehi thūpaṃ katvāna, sugatassa mahesino;

Kappānaṃ satasahassaṃ, duggatiṃ nupapajjahaṃ.

23.

‘‘Cattālīsasahassamhi , kappe soḷasa khattiyā;

Nāmenaggisamā nāma, cakkavattī mahabbalā.

24.

‘‘Vīsakappasahassamhi, rājāno cakkavattino;

Ghatāsanasanāmāva, aṭṭhattiṃsa mahīpatī.

25.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā pupphathūpiyo thero imā gāthāyo abhāsitthāti.

Pupphathūpiyattherassāpadānaṃ dutiyaṃ.

3. Pāyasadāyakattheraapadānaṃ

26.

‘‘Suvaṇṇavaṇṇo sambuddho, bāttiṃsavaralakkhaṇo;

Pavanā [padhāno (ka.)] abhinikkhanto, bhikkhusaṅghapurakkhato [suvaṇṇavaṇṇaṃ …pe… purakkhataṃ-evaṃ dutiyantavasena sī. syā. potthakesu dissati].

27.

‘‘Mahaccā [sahatthā (syā. ka.)] kaṃsapātiyā, vaḍḍhetvā pāyasaṃ [pāyāsaṃ (syā. ka.)] ahaṃ;

Āhutiṃ yiṭṭhukāmo so, upanesiṃ baliṃ ahaṃ.

28.

‘‘Bhagavā tamhi samaye, lokajeṭṭho narāsabho;

Caṅkamaṃ susamārūḷho, ambare anilāyane.

29.

‘‘Tañca acchariyaṃ disvā, abbhutaṃ lomahaṃsanaṃ;

Ṭhapayitvā kaṃsapātiṃ, vipassiṃ abhivādayiṃ.

30.

‘‘Tuvaṃ devosi [buddhosi (syā.)] sabbaññū, sadeve sahamānuse;

Anukampaṃ upādāya, paṭigaṇha mahāmuni.

31.

‘‘Paṭiggahesi bhagavā, sabbaññū lokanāyako;

Mama saṅkappamaññāya, satthā loke mahāmuni [anuttaro (syā.)].

32.

‘‘Ekanavutito kappe, yaṃ dānamadadiṃ tadā;

Duggatiṃ nābhijānāmi, pāyasassa [pāyāsassa (syā. ka.)] idaṃ phalaṃ.

33.

‘‘Ekatālīsito kappe, buddho nāmāsi khattiyo;

Sattaratanasampanno, cakkavattī mahabbalo.

34.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā pāyasadāyako [pāyāsadāyako (syā. ka.)] thero imā gāthāyo abhāsitthāti.

Pāyasadāyakattherassāpadānaṃ tatiyaṃ.

4. Gandhodakiyattheraapadānaṃ

35.

‘‘Nisajja pāsādavare, vipassiṃ addasaṃ jinaṃ;

Kakudhaṃ vilasantaṃva, sabbaññuṃ tamanāsakaṃ [sabbaññuttamanāyakaṃ (syā.), sabbaññutamanāsavaṃ (ka.)].

36.

‘‘Pāsādassāvidūre ca, gacchati lokanāyako;

Pabhā niddhāvate tassa, yathā ca sataraṃsino.

37.

‘‘Gandhodakañca paggayha, buddhaseṭṭhaṃ samokiriṃ;

Tena cittappasādena, tattha kālaṅkato ahaṃ.

38.

‘‘Ekanavutito kappe, yaṃ gandhodakamākiriṃ;

Duggatiṃ nābhijānāmi, buddhapūjāyidaṃ phalaṃ.

39.

‘‘Ekattiṃse ito kappe, sugandho nāma khattiyo;

Sattaratanasampanno, cakkavattī mahabbalo.

40.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā gandhodakiyo thero imā gāthāyo abhāsitthāti.

Gandhodakiyattherassāpadānaṃ catutthaṃ.

5. Sammukhāthavikattheraapadānaṃ

41.

‘‘Jāyamāne vipassimhi, nimittaṃ byākariṃ ahaṃ;

‘Nibbāpayiñca [nibbāpayaṃ ca (sī. syā.), nibbāpayanto (?)] janataṃ, buddho loke bhavissati.

42.

‘‘‘Yasmiñca jāyamānasmiṃ, dasasahassi kampati;

So dāni bhagavā satthā, dhammaṃ deseti cakkhumā.

43.

‘‘‘Yasmiñca jāyamānasmiṃ, āloko vipulo ahu;

So dāni bhagavā satthā, dhammaṃ deseti cakkhumā.

44.

‘‘‘Yasmiñca jāyamānasmiṃ, saritāyo na sandayuṃ [sandisuṃ (sī. syā.)];

So dāni bhagavā satthā, dhammaṃ deseti cakkhumā.

45.

‘‘‘Yasmiñca jāyamānasmiṃ, avīcaggi na pajjali;

So dāni bhagavā satthā, dhammaṃ deseti cakkhumā.

46.

‘‘‘Yasmiñca jāyamānasmiṃ, pakkhisaṅgho na saṃcari;

So dāni bhagavā satthā, dhammaṃ deseti cakkhumā.

47.

‘‘‘Yasmiñca jāyamānasmiṃ, vātakkhandho na vāyati;

So dāni bhagavā satthā, dhammaṃ deseti cakkhumā.

48.

‘‘‘Yasmiñca jāyamānasmiṃ, sabbaratanāni jotayuṃ [jotisuṃ (sī. syā.)];

So dāni bhagavā satthā, dhammaṃ deseti cakkhumā.

49.

‘‘‘Yasmiñca jāyamānasmiṃ, sattāsuṃ padavikkamā;

So dāni bhagavā satthā, dhammaṃ deseti cakkhumā.

50.

‘‘‘Jātamatto ca sambuddho, disā sabbā vilokayi;

Vācāsabhimudīresi, esā buddhāna dhammatā’.

51.

‘‘Saṃvejayitvā janataṃ, thavitvā lokanāyakaṃ;

Sambuddhaṃ abhivādetvā, pakkāmiṃ pācināmukho.

52.

‘‘Ekanavutito kappe, yaṃ buddhamabhithomayiṃ;

Duggatiṃ nābhijānāmi, thomanāya idaṃ phalaṃ.

53.

‘‘Ito navutikappamhi, sammukhāthavikavhayo;

Sattaratanasampanno, cakkavattī mahabbalo.

54.

‘‘Pathavīdundubhi nāma [duddasi nāma (ka.)], ekūnanavutimhito;

Sattaratanasampanno, cakkavattī mahabbalo.

55.

‘‘Aṭṭhāsītimhito kappe, obhāso nāma khattiyo;

Sattaratanasampanno, cakkavattī mahabbalo.

56.

‘‘Sattāsītimhito kappe, saritacchedanavhayo;

Sattaratanasampanno, cakkavattī mahabbalo.

57.

‘‘Agginibbāpano nāma, kappānaṃ chaḷasītiyā;

Sattaratanasampanno, cakkavattī mahabbalo.

58.

‘‘Gatipacchedano nāma, kappānaṃ pañcasītiyā;

Sattaratanasampanno, cakkavattī mahabbalo.

59.

‘‘Rājā vātasamo nāma, kappānaṃ cullasītiyā;

Sattaratanasampanno, cakkavattī mahabbalo.

60.

‘‘Ratanapajjalo nāma, kappānaṃ teasītiyā;

Sattaratanasampanno, cakkavattī mahabbalo.

61.

‘‘Padavikkamano nāma, kappānaṃ dveasītiyā;

Sattaratanasampanno, cakkavattī mahabbalo.

62.

‘‘Rājā vilokano nāma, kappānaṃ ekasītiyā;

Sattaratanasampanno, cakkavattī mahabbalo.

63.

‘‘Girasāroti nāmena, kappesītimhi khattiyo;

Sattaratanasampanno, cakkavattī mahabbalo.

64.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sammukhāthaviko thero imā gāthāyo abhāsitthāti.

Sammukhāthavikattherassāpadānaṃ pañcamaṃ.

6. Kusumāsaniyattheraapadānaṃ

65.

‘‘Nagare dhaññavatiyā, ahosiṃ brāhmaṇo tadā;

Lakkhaṇe itihāse ca, sanighaṇḍusakeṭubhe.

66.

‘‘Padako veyyākaraṇo, nimittakovido ahaṃ;

Mante ca sisse vācesiṃ, tiṇṇaṃ vedāna pāragū.

67.

‘‘Pañca uppalahatthāni, piṭṭhiyaṃ ṭhapitāni me;

Āhutiṃ yiṭṭhukāmohaṃ, pitumātusamāgame.

68.

‘‘Tadā vipassī bhagavā, bhikkhusaṅghapurakkhato;

Obhāsento disā sabbā, āgacchati narāsabho.

69.

‘‘Āsanaṃ paññapetvāna, nimantetvā mahāmuniṃ;

Santharitvāna taṃ pupphaṃ, abhinesiṃ sakaṃ gharaṃ.

70.

‘‘Yaṃ me atthi sake gehe, āmisaṃ paccupaṭṭhitaṃ;

Tāhaṃ buddhassa pādāsiṃ, pasanno sehi pāṇibhi.

71.

‘‘Bhuttāviṃ kālamaññāya, pupphahatthamadāsahaṃ;

Anumoditvāna sabbaññū, pakkāmi uttarāmukho.

72.

‘‘Ekanavutito kappe, yaṃ pupphamadadiṃ tadā;

Duggatiṃ nābhijānāmi, pupphadānassidaṃ phalaṃ.

73.

‘‘Anantaraṃ ito kappe, rājāhuṃ varadassano;

Sattaratanasampanno, cakkavattī mahabbalo.

74.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā kusumāsaniyo thero imā gāthāyo abhāsitthāti.

Kusumāsaniyattherassāpadānaṃ chaṭṭhaṃ.

7. Phaladāyakattheraapadānaṃ

75.

‘‘Ajjhāyako mantadharo, tiṇṇaṃ vedāna pāragū;

Himavantassāvidūre, vasāmi assame ahaṃ.

76.

‘‘Aggihuttañca me atthi, puṇḍarīkaphalāni ca;

Puṭake nikkhipitvāna, dumagge laggitaṃ mayā.

77.

‘‘Padumuttaro lokavidū, āhutīnaṃ paṭiggaho;

Mamuddharitukāmo so, bhikkhanto mamupāgami.

78.

‘‘Pasannacitto sumano, phalaṃ buddhassadāsahaṃ;

Vittisañjanano mayhaṃ, diṭṭhadhammasukhāvaho.

79.

‘‘Suvaṇṇavaṇṇo sambuddho, āhutīnaṃ paṭiggaho;

Antalikkhe ṭhito satthā, imaṃ gāthaṃ abhāsatha.

80.

‘‘‘Iminā phaladānena, cetanāpaṇidhīhi ca;

Kappānaṃ satasahassaṃ, duggatiṃ nupapajjasi’.

81.

‘‘Teneva sukkamūlena, anubhotvāna sampadā;

Pattomhi acalaṃ ṭhānaṃ, hitvā jayaparājayaṃ.

82.

‘‘Ito sattasate kappe, rājā āsiṃ sumaṅgalo;

Sattaratanasampanno cakkavattī mahabbalo.

83.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā phaladāyako thero imā gāthāyo abhāsitthāti.

Phaladāyakattherassāpadānaṃ sattamaṃ.

8. Ñāṇasaññikattheraapadānaṃ

84.

‘‘Pabbate himavantamhi, vasāmi pabbatantare;

Pulinaṃ sobhanaṃ disvā, buddhaseṭṭhaṃ anussariṃ.

85.

‘‘Ñāṇe upanidhā natthi, saṅkhāraṃ [saṅgāmaṃ (sī. syā.), saṅkhātaṃ (theragāthā aṭṭha.)] natthi satthuno;

Sabbadhammaṃ abhiññāya, ñāṇena adhimuccati.

86.

‘‘Namo te purisājañña, namo te purisuttama;

Ñāṇena te samo natthi, yāvatā ñāṇamuttamaṃ.

87.

‘‘Ñāṇe cittaṃ pasādetvā, kappaṃ saggamhi modahaṃ;

Avasesesu kappesu, kusalaṃ caritaṃ [karitaṃ (sī. syā.), kiriyaṃ (ka.)] mayā.

88.

‘‘Ekanavutito kappe, yaṃ saññamalabhiṃ tadā;

Duggatiṃ nābhijānāmi, ñāṇasaññāyidaṃ phalaṃ.

89.

‘‘Ito sattatikappamhi [tesattatikappe (sī. syā.)], eko pulinapupphiyo;

Sattaratanasampanno, cakkavattī mahabbalo.

90.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā ñāṇasaññiko thero imā gāthāyo abhāsitthāti.

Ñāṇasaññikattherassāpadānaṃ aṭṭhamaṃ.

9. Gaṇṭhipupphiyattheraapadānaṃ

91.

‘‘Suvaṇṇavaṇṇo sambuddho, vipassī dakkhiṇāraho;

Purakkhato sāvakehi, ārāmā abhinikkhami.

92.

‘‘Disvānahaṃ buddhaseṭṭhaṃ, sabbaññuṃ tamanāsakaṃ;

Pasannacitto sumano, gaṇṭhipupphaṃ [gatamaggaṃ (syā. ka.)] apūjayiṃ.

93.

‘‘Tena cittappasādena, dvipadindassa tādino;

Haṭṭho haṭṭhena cittena, puna vandiṃ tathāgataṃ.

94.

‘‘Ekanavutito kappe, yaṃ pupphamabhiropayiṃ;

Duggatiṃ nābhijānāmi, buddhapūjāyidaṃ phalaṃ.

95.

‘‘Ekatālīsito kappe, caraṇo nāma khattiyo;

Sattaratanasampanno, cakkavattī mahabbalo.

96.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā gaṇṭhipupphiyo [gandhapupphiyo (syā. ka.)] thero imā gāthāyo abhāsitthāti.

Gaṇṭhipupphiyattherassāpadānaṃ navamaṃ.

10. Padumapūjakattheraapadānaṃ

97.

‘‘Himavantassāvidūre , gotamo nāma pabbato;

Nānārukkhehi sañchanno, mahābhūtagaṇālayo.

98.

‘‘Vemajjhamhi ca tassāsi, assamo abhinimmito;

Purakkhato sasissehi, vasāmi assame ahaṃ.

99.

‘‘Āyantu me sissagaṇā, padumaṃ āharantu me;

Buddhapūjaṃ karissāmi, dvipadindassa tādino.

100.

‘‘Evanti te paṭissutvā, padumaṃ āhariṃsu me;

Tathā nimittaṃ katvāhaṃ, buddhassa abhiropayiṃ.

101.

‘‘Sisse tadā samānetvā, sādhukaṃ anusāsahaṃ;

Mā kho tumhe pamajjittha, appamādo sukhāvaho.

102.

‘‘Evaṃ samanusāsitvā, te sisse vacanakkhame;

Appamādaguṇe yutto, tadā kālaṅkato ahaṃ.

103.

‘‘Ekanavutito kappe, yaṃ pupphamabhiropayiṃ;

Duggatiṃ nābhijānāmi, buddhapūjāyidaṃ phalaṃ.

104.

‘‘Ekapaññāsakappamhi, rājā āsiṃ jaluttamo;

Sattaratanasampanno, cakkavattī mahabbalo.

105.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā padumapūjako thero imā gāthāyo abhāsitthāti;

Padumapūjakattherassāpadānaṃ dasamaṃ.

Sereyyavaggo terasamo.

Tassuddānaṃ –

Sereyyako pupphathūpi, pāyaso gandhathomako;

Āsani phalasaññī ca, gaṇṭhipadumapupphiyo;

Pañcuttarasatā gāthā, gaṇitā atthadassibhi.

 

* Bài viết trích trong Khuddakanikāya >> Suttapiṭaka >> Tipiṭaka (Mūla), nguồn Tipitaka.org. Tải sách PDF tại đây.

TẢI MOBILE APP PHẬT GIÁO THERAVĀDA ĐỂ XEM THÊM NHIỀU THÔNG TIN HỮU ÍCH (ANDROID & IOS)